ᓯᓖᓇ ᐃᓅᕗᖅ ᑲᓇᑕᒥᐅᑕᖅ ᑕᑯᒥᓇᖅᑐᓕᐅᖅᑎ, ᐃᓅᓂᑯ ᖃᐅᓱᐃᑦᑐᒥ, ᓄᓇᕗᒻᒥ. ᓯᓖᓇ ᑕᑯᒥᓇᖅᑐᓕᐅᖅᑎᐅᕗᖅ, ᑎᑎᕋᖅᑎᐅᓪᓗᓂ, ᐱᓪᓚᕆᖖᒍᐊᖅᑎᐅᓪᓗᓂ, ᑎᑎᖅᑐᒐᖅᑎᐅᓪᓗᓂᓗ. ᖃᐅᔨᒪᔭᐅᔾᔪᑎᖃᖅᑐᓂ ᑲᑕᔾᔭᖅᑎᐅᓂᖓᓂᒃ, ᓄᓇᕐᔪᐊᕐᒥ ᖃᓄᐃᓕᐅᕐᓂᕐᔪᐊᕐᓂᖃᖅᑎᓪᓗᒋᑦ ᐊᐃᓯᒪᓲᖅ. ᓯᕗᓪᓕᖅᐹᖅ ᐅᖃᓕᒫᒐᓕᐊᕕᓂᖓ, ‘ᑯᓗᒃ’ ᓴᖅᑭᑕᐅᓂᑯ ᐃᓐᕼᐋᐱᑦ ᒦᑎᐊᒃᑯᓐᓄᑦ, ᑕᐃᔭᐅᓐᓂᖅᐳᖅ ᕼᐊᕕᖕᑕᑯᓐᓄᑦ 2014ᖑᑎᓪᓗᒍ ᓯᓐᓇᒃᓴᐅᑎᑦᑎᐊᕙᐅᓛᖑᓂᕋᖅᑕᐅᓪᓗᓂ ᐅᖃᓕᒫᒐᕐᓂᒃ. ᓯᓖᓇ ᐊᓈᓇᖖᒍᐊᖑᓪᓗᓂ ᐊᓯᕗᑦ ᑕᐃᒃᑯᐊᒥ, ᐸᓂᖕᒥᓂᒃ ᓴᒃᑯᐃᑦᑕᐃᓕᒪᓇᓱᕐᔪᐊᖖᒍᐊᖅᐳᖅ.

ᐃᓕᓴᐱ ᕋᐃᔭ ᑎᑎᕋᖅᑎᐅᕗᖅ, ᓂᐱᒥᒍᑦ ᐱᓪᓚᕆᒃᑎᖖᒍᐊᖑᓪᓗᓂ, ᐊᒻᒪ ᐃᓕᓐᓂᐊᖅᑎᑦᑎᔨᐅᓪᓗᓂ ᐃᖃᓗᖕᓂ, ᓄᓇᕗᒻᒥ. ᐃᓕᓴᐃᔨᐅᓪᓗᓂ, ᐃᓕᓴᐱ ᑐᑭᓯᐅᒪᔪᖅ ᑐᓴᒐᒃᓴᓕᐅᕈᑎᖃᒃᑲᓐᓂᕆᐊᖃᕐᓂᖓᓂᒃ ᐃᓄᒃᑎᑑᖅᑐᓂᒃ. ᐃᑲᔫᑎᖃᖅᐸᒃᐳᖅ ᐱᓕᕆᐊᖃᖅᑐᓂ ᓂᐱᒃᑯᑦ ᐱᓪᓚᕆᒃᑎᖖᒍᐊᖑᓪᓗᓂ, ᐆᒃᑑᒪᔭᒃᑐᓂᓗ ᐊᔾᔨᒌᖖᒋᑦᑐᑎᒍᑦ ᑕᕐᕆᔮᒃᓴᖅᑎᒍᑦ ᑕᓚᕖᓴᒃᑯᓪᓗ. ᐃᓕᓴᐱ ᐸᓂᒋᔭᐅᖖᒍᐊᖅᐳᖅ, ᓇᓕᒧᒃᑎᑦᑎᓇᓱᒃᑐᓂ ᐊᓈᓇᖓᑕ ᒪᓕᒐᖏᓐᓂᒃ ᓇᖕᒥᓂᖅᓱᕋᓱᖕᓂᕐᒥᓂᒡᓗ.

ᕕᓐᓯᓐᑦ “ᕕᓂ” ᖃᕆᑕᖅ ᐃᓅᓂᑯ ᐊᕐᕕᐊᓂ, ᓄᓇᕗᒻᒥ, ᐃᖃᓗᖕᒥᐅᑕᐅᓕᖅᑐᖅ, ᓄᓇᕗᒻᒥ, ᐊᕐᕌᒍᓂ 20ᓂᒃ. ᖃᕆᑕᖅ ᐱᓪᓚᕆᒃᑎᖖᒍᐊᖅ ᑕᕐᕆᔮᒃᓴᓂᒃ, ᑕᓚᕖᓴᒃᑯᑦ ᐊᒻᒪ ᖁᖖᒋᐊᕐᕕᖕᓂᒃ, ᕿᓚᐅᔾᔭᖅᑎᐅᔪᖅ ᐅᖃᖅᑎᐅᕙᒃᑭᓪᓗᓂᓗ. ᓄᓇᕗᒻᒥ ᓴᖅᑭᔮᕐᓂᖃᓪᓚᕆᓲᖅ ᖁᕕᐊᓲᑎᖃᓕᕌᖓᑕ, ᖃᓄᐃᓕᐅᕐᓂᓂᒃ ᖁᖖᒋᐊᖅᑕᐅᔪᖃᖅᑎᓪᓗᒍᓗ, ᑕᖃᓱᐃᑦᑑᓪᓗᓂᓗ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᒡᓗ ᓴᖅᑭᔮᖅᑎᑦᑎᓂᕐᒥᒃ ᓯᕗᓕᓪᓚᕆᒃᐸᒃᑭᓪᓗᓂ ᐃᓄᐃᑦ ᐱᓪᓚᕆᖖᒍᐊᕐᓂᖖᒋᑦᑎᒍᑦ. ᕕᓂ ᐆᒪᔪᕐᓗᖖᒍᐊᖑᔪᖅ, ᖃᓪᓗᐱᓪᓗᒃ ᓄᓇᒨᕐᓂᑯ. ᐆᒪᔪᕐᓘᑉ ᐃᓱᒪᒐ ᐅᓚᕕᓯᒪᕗᖅ ᐃᓐᓇᕐᒧᑦ, ᖁᕕᐊᒋᔭᖃᒻᒪᕆᒃᑐᓂᓗ ᐃᓕᖅᑯᓯᑐᖃᕐᓂᒃ.

ᓗᐃᔅ ᐱᕈᖅᓴᓯᒪᔪᖅ ᑲᖏᖅᑐᒑᐱᖕᒥ, ᓄᓇᕗᒻᒥ. ᐱᕈᖅᓴᑎᓪᓗᒍ, ᓗᐃᔅ ᐅᓂᒃᑳᖅᑐᐊᖅᑎᓂᒃ ᓈᓚᒃᐸᓚᐅᖅᓯᒪᕗᖅ. 2005ᒥ, ᓗᐃᔅ ᐱᒋᐊᖅᑎᑦᑎᖃᑕᐅᓚᐅᖅᓯᒪᕗᖅ ᐃᓐᕼᐋᐱᑦ ᒦᑎᐊ Incᒥ., ᓇᖕᒥᓂᖅᓱᖅᑐᓂ ᐅᖃᓕᒫᒐᓕᐅᕐᕕᒃ ᐱᔾᔪᑎᖃᖅᑐᖅ ᐸᐸᑦᑎᓂᕐᒥᒃ ᓴᖅᑭᔮᖅᑎᑦᑎᓂᕐᒥᒡᓗ ᐃᓄᐃᑦ ᖃᐅᔨᒪᔭᖏᓐᓂᒃ ᐱᒻᒪᕆᐅᒋᔭᖏᓐᓂᒡᓗ, ᐃᓄᐃᓪᓗ ᐅᖃᐅᓯᖓᓂᒃ. ᐃᓐᕼᐋᐱᑦ ᒦᑎᐊ ᐅᖃᓕᒫᒐᒐᓛᓗᖕᓂᒃ ᐃᓄᒃᑎᑑᖅᑐᓂᒡᓗ ᐱᓕᕆᔾᔪᑎᓂᒃ ᓴᖅᑮᓯᒪᓕᖅᐳᑦ ᐊᑐᖅᑕᐅᔪᓂᒃ ᐃᓕᓐᓂᐊᕐᕕᖕᓂ ᓄᓇᕗᒻᒥ. ᓗᐃᔅ ᓂᖏᐅᕆᔭᐅᖖᒍᐊᖅᐳᖅ, ᐃᓚᔮᖏᑦ ᐃᓕᓴᐃᔾᔪᑎᖏᓐᓂᒃ ᐃᖅᑲᐅᒪᔭᐅᔭᕆᐊᖃᕐᓂᐊᖅᐳᑦ.